سمعاً وطاعة

لي عشرة اسنين و انا اعيش في عزله
ماهي غريبه علي العيشه الحالي

للنفس حفظ اوحفاظ النفس يرخصله
وجه البسيطه وما يحويه من غالي

كرامة النفس واجب والثنا ل اهله
والفال طيب وعز النفس من فالي

قلنا من اول لكن الخلق في جهله
ماينفع ابن ادم الا زين الافعالي

خلو ضجيج العرب للوقعه السهله
واليوم يانفس فرّي للخلا الخالي

انحش عن المجتمع واللمه الضحله
اللي وباها مع العربان جوّالي

واسبغ وضوّك ويم الوجه للقبله
وارفع يدينك وقل يالله ياوالي

العفو ياربنا الرحمن وانت اهله
والمغفره منك وأجل الكرب يالعالي

ووفق جهودن على الاسباب منبذله
وارفع مصاب البشر نازل ورحالي

وان قلت قولي ف انا ثابت وواقفله
واحمى كلامي وشفني عايش إلحالي

طايع وسامع لراع الكلمه الجزله
ولاني مخالف ل امر من جيته أموالي

يبقا مطاعي عباده واجبه سهله
الله ثم النبي واللي علي والي

الشاعر : علي بن حريبيش